Baru!!! Hentikan Perbalahan Sesama Sendiri Demi Pasukan Kelantan
Bo la duk balohnyo, samo-samo puok kito belako key. Doh pakat kato nok majukan bolasepak Kelate. Doh makin maju ko bolasepak Kelate kalu masing-masing duk pakat baloh kekoh samo sendiri.
Hok alik ni kato gini, hok alik tu kato gitu. Sorey kecek ko facebook, sorey geger alik instagram. Pah gapo hok pasukey Kelate bulih?
Namo Kelate tiap-tiap ari tubik surat khabar, bukan pasal bulih gi bukit jalil, bukey pasal meney pialo, tapi pasal duk baloh kekoh set-set orang atas ni.
Tok leh ko pakat molep set-set mung, bawok gi bincey mejo bulat, kecek molep-molep. Duduk semejo bincey wi selesai masaloh. Gapo dio masaloh, ado tok puah ati, royak lah. Mu nok baloh, nok wi woh tomoi woh siku woh lutut pah atah palo, ikut pandai set mung la. Janji jangey duk geger sapa orang ramai dengar. Malu kokram ramai.
Abe bukan gapo, tebal doh muko. Bo nok kecek pasal bola keno pakoh selalu ko set team lain.
Ayoh War sendiri bukey budok-budok, penyokong Kelate angkat Ayoh War sebagai 'Bapa Bolasepak Kelate'. Doh bakpo duk main gitu.
Dato Seri Vida pulok bukan oghe tok kenal, tiap-tiap ari muko tubik dalam tb, duk ngepeng 'muah muah'.
Pakat molep la nok naikkan semula pasukan Kelate. Duk baloh kekoh takkan selesai masaloh. Tok soh duk pakat kerah pedal, kerah palo belako lah.
Abe tegur ni bukey sebab Abe pandai sangat, tapi Abe sayang ko pasukan Kelate.
